TIUᴺ CHHITLÔNG PĒÁKIÁᴺ Ê BŌNG
Inūi 1 chhiú Khehgí si, 2022 góa tō chio pêngiú tàutīn khí Hōnglîm chhamka 228 tuisu lépài, mā kàu Tiuⁿ Chhitlông ê bōng thâuchêng kā le̍ksú khòaⁿ hó bêng.
Ha̍khāu khòpún bô siá, tongjiân mā m̄chai Pe̍hsek Khióngpò͘ sîtāi tī Hoaliân hoatseng ê tāichì. Tìkàu 2020 liáu, tī Sêngtāi siōng Khehgí khò, Sinseⁿ hunhióng Liû Fichṳ̂n (Lâu Hūichin) ê Khehgí si "Funglìm Mìnsàn", Tâigí ê ìsù sī "Hōnglîm Bêngsiân".
7-ELEVEn tō-sī chá-chêng in-tau ê pīⁿ-īⁿ.
Ēbīn ê hunhióng ê 1 tōaⁿ "Liânsòa 6 ê chhèngsiaⁿ, bô tīteh ah", hō͘ góa ê ìnsiōng chin chhim.
Chiū ánni, 2022 ê 4 goe̍h, góa chio pêngiú chòhóe chē hóechhia khì Hōnglîm Kàuhōe chò lépài. Tòe chènglâng tàutīn kàu Chông Chhitlòng (Tiuⁿ Chhitlông) pēákiáⁿ ê bōng thâuchêng kā i kìliām.
Hâisúi tûngliù. Yùyù sṳ amya. Ngiûn m̂he̍t ke yânchhìn. Ngìn kóng ngài ke miang án ngang. Âpâ, âkô, âsuk. Liènsa. Liukha chhungsâng. Mô, Chhôi, Lè. – Liû Fichṳ̂n "Funglìm Mìnsàn"
Hitsî mā ū tòe tī lépàitn̂g hiànsi ê Siangliân Thoânkheh chòhóe kiâⁿ. Ta̍k ê lóng chin jia̍tchêng. In siōng hòⁿhiân ê: ná ē nn̄g ê siàuliânlâng ē siūⁿbeh liáukái chia ê le̍ksú? Bo̍ksu tō mn̄g kóng "kám sī ài chò kongkhò?" Góa èng: "Tongjiân m̄ sī."
Hitchun, ū kàu Tiuⁿka ê chhù lāité, tō chē tī Chông Ngiu̍ksàn â'phò (Tiuⁿ Gio̍ksiân a'má) ê piⁿ'á, thiaⁿ I katī kóng 1947 4 goe̍h chhe 4 hit mî hoatseng ê tāichì. Suijiân góa chin kutla̍t kóng Hakfa, m̄kú góa o̍h ê Bilongōe kap Hōnglîm chia chha kài chōe. Koh hō͘ â'phò tòngchòe gōakokōe. Mā sī chhùbī chhùbī lah hoⁿh.
Tāi-pō͘-hūn sī kóng Hak-fa ê.
Kūnî bóe, â'phò tòtńgkhì thiankok ê chhù, koh hō͘ góa chi̍tpái kámsiū. Ētàng kiànchèng le̍ksú ê lâng ná lâi ná chió. Tâioânlâng kám ē ū chi̍tkâng, lán lóng bô iàukín sutongsî tāichì hoatseng ê kengkòe leh!
