Tayal ê chóngkunthâu, Pinsbkan.
Suibóng kap Tayal siosiâng ê gígiân chin chē, mā ū 2 chióng khòaⁿhoat, tùi Tayal chóng kunthâu ê só͘chāi, chóng'sī 2021 kôaⁿ'lâng sî, 1 tīn Lâmtâu ê pêngiú tō siochio lâikhì Pinsbkan kiâⁿkiâⁿ.
Nā beh kàu chia, sī chin bô kantan, ēsái kóng sī soaⁿlāi ê soaⁿlāi, góa katī sī seng chē hóechhia kàu Tâitiong pôaⁿchhia kàu Po͘lí, koh chài chhiáⁿ pêngiú sáichhia, sái Tâi 14 Sòaⁿ, koh choán Tâu 89 Sòaⁿ, pêngsiôngsî bô iûkheh, tiámpòaⁿcheng tō kàu, m̄kú chaiiáⁿ soaⁿlō͘ chin khióngpò͘, māsī ū thun hînchhia io̍h'á.
Chhialāi, tûliáu góa, mā ū 2 ūi "laqi na Tayal" (Tāiián ê gín'á), sáichhia ê hitūi kóng kah chin liúlia̍h, lēnggōa 1 ūi khah bēhiáu kóng mā sī lóng thiaⁿ ū cho̍kgí. M̄koh mn̄g 1 ē, 2 ê lâng lóng bô khì kòe Pinsbkan. Siáⁿmih sī Pinsbkan (Pīn-sū-bô-kán) leh? Chiūsī Tayal ê chó͘sian seⁿ'chhutlâi ê chio̍hthâu hia.
"Pinsbkan", jīkun sī "bka" piakkhui a̍hsī pun 1 pòaⁿ ê ìsù, "sbka" sī hō͘ I piakkhui, "pin" sī kòekhì, "an" tāipiáu só͘chāi, nā tàuchò hòe tōsī "íchêng bat piakkhui ê só͘chāi". Chinchōe lâng kóng chia íchêng "" bat piatkhui jîchhiáⁿ ùi lāité kā lâng seⁿ'chhutlâi. -- Tēⁿ Kngphok
Gún sī 2 kang 1 mê, seng kàu Mstbon chiah sûnsoah khí Pinsbkan, hùkīn suijiân chin o̍h kàuūi, m̄koh mā inūi lî to͘chhī hn̄ghn̄ghn̄g, hongkéng chin súi, mā ū unchôaⁿ kap pō͘lo̍k ēsái kiâⁿta̍h, putsî māsī ū lâng ē lâi chhitthô. M̄koh gún 12 goe̍h khì, kôaⁿ kah beh sí, tī pêngiú khui ê lō͘iâⁿ khu chúchia̍h, lim chiú, māsī chin sóngkhoài.
Hoâiⁿti̍t Sintek hia ê Tayal mā ū katī ê chio̍hthâu, ū tī tiánlám "phgup" khòaⁿkòe iáⁿphìⁿ, nā ū êng māsī chin siūⁿbeh khí khòaⁿmāi 1 ē. Mā thiaⁿ kóng, tī Mstbon hùkīn 1 lia̍p tōa chio̍hthâu, sī beh phiàn Ji̍tpúnlâng iōng'ê, soaⁿlāi koh ū 1 lia̍p chin ê. Chóng'sī chia íkeng sī ta̍k nî pān chètián bíílâi mā thiaⁿkóng beh chò koankong hn̂gkhu ê só͘chāi.
Tio̍h lah! Pinsbkan ê thoânsoat kóng, chio̍hthâu piakkhui sī kîsi̍t m̄sī 2 ê lâng (chapo͘ kap chabó͘) nātiāⁿ, tē 3 ē chapo͘ chhutlâi khòaⁿ chit ê sèkài, koh tòtńgkhì chio̍hthâu lāi, siūⁿsiūⁿ, nā góa mā ē kiâⁿ tòtńgkhì.
