“He oi á, Hiû Sû” Thòipet chhòng
1 ngie̍t chang tui Thòinàm pitngia̍p, án kiak chhiu oi si̍pkoan Thòipet ke sênfa̍t. 2 ngie̍t thâng tó Hiû Sû voi thê Ńgmùtiam peúyên, chhiu tó hienchhòng, song 1 pài lòi liáphién m̀tî yû 10 ngièn chhién mò?
2022 ngièn mî, yînvi phènyû he Hiû Sû ke phènyû, yû 1 pài tî kì ke tiam tîtú thâng tó, chhiu khôisṳ́ thâng, khónèn me he liáha ngài kha thâng tet sṳt Hakfa lé, sióng oi liáukié Hiû Sû ke kôchhṳ̀ oi péutha̍t makke sṳchhìn, thi̍tphie̍t he “Vùkiéutiâu” liá kô'è, kôchhṳ̀ yitchhṳ̍t mun tûngsî hi nai lé, kusó ngài chhiu chhìm yitha, fathien he Hakngìn ke kôyèu “âchiùchien”.
Honsṳ chotet chhṳkâ chhìm, ngài siá Pha̍kfasṳ:
âchiùchien, mî thòthò. mò yà mò ôi thèn sukphò. suk phò nè? chóngngiù lé. ngiù né? mai thet lé. chhièn nè? thó pûngiòng lé. pûngiòng nè? chung chhoi lé. chhoi nè? tá chṳ́ lé. chṳ́ né? cho yù lé. yù nè? tiámfó lé. fó nè? pûn âchiùchien pûn tiâu thet lé.
"Âchiùchien" he 1 chúng tiâu'é ke miàng'è, Tâigí ônto "O͘chhiu", kámkok Hakfa pûn sengìn'è thâng ke kô'è me chhin pîsông. Hiû Sû kâsong thienchṳ́ ke tá kú sâng'è, yu kha pîsông lé.
