Dec 21, 2024 5 min read Kohiông

KACHÀI 2024 IÁU KOH Ū IMGA̍K CHÒEPHŌAᴺ

Chū kó͘chá kó͘chá, tō khaisí ū hunhióng imga̍k ê koànsì. Sèhàn sî khà tiānōe khí tiāntâi tiámkoa. Kokhāu'á chah CD khí ha̍khāu. Tī Yahoo! Messenger kap MSN ê "chōngthài" khǹg koamiâ. Tng Twitter, Plurk, Facebook, Instagram hoattián, koh ū "Stories" chhuthiān, lán chísī ōaⁿ chi̍t ê só͘chāi kap bôkâng ê lâng ēng bôkâng ê hongsek hunhióng hóthiaⁿ ê koa. Kinnî mā sī chin chē hó ê chokphín, chin hoaⁿhí ētàng thiaⁿ hiachē hō͘ lâng kámtōng ê koa.

Tī Bángkah tòa tēhāsek, àmsî'á liān DJ pàngkoa.

🥇 TĒ IT MIÂ Emmett Kai - Holy Nitros

Emmett Kai kaⁿná m̄ sī kài ū miâ ê lâng. Hoâiⁿti̍t góa chit kúinî chhiúki'á lóng ū khiām i ê "Baby Hits!" thiaⁿ, ū sî chhut sin ê koa, lūihêng chha chin chē, m̄koh kin nî chit tiuⁿ koh ū hit ê hō͘ lâng kámkak sîkan chiok bān ê.

🥈 TĒ JĪ MIÂ Cornelius - Sketch For Spring

Cornelius íkeng kài ū miâ ah, bián kàisiāu. M̄koh chit khek sī só͘ū lāité hō͘ góa ēsái tòngchò katī chútêkhek ê koa. Lūisû nā sī chheⁿhūnlâng kā góa mn̄g lí lóng thiaⁿ siáⁿkhoán ê, tō ēsái kéng chit ê pò i chai.

🥉 TĒ SAᴺ MIÂ Pale Jay - Love Around the World

Kaⁿná tī Instagram chhiau tio̍h ê, bīn lóng chah khílâi, chiok kîkoài ê. M̄koh si̍tchèsiōng, koa soah sī hiahnī hō͘ lâng kámkak unloán ê khìhun. Tō chhinchhiūⁿ chit khek koamiâ. Nā lí kámkak kôaⁿ ēsái thiaⁿ.

🏆 TE̍KPIA̍TCHIÓNG Chiaulîm - Thôhoe Kòetō͘ (ft. Ngô͘ Hoekóechí)

2024 kā Chiaulîm tàusaⁿkang thiaⁿ i ê Tâigíkoa, tàu thiaⁿ tóim, tàu khòaⁿ koasû, ánnē thólūn 1 tang koh kòe ah. Suibóng iáu koh ū chin chē thang koh chìnpō͘ ê, m̄-koh chit tiâu kó͘chá koa, ta̍ttit hunhióng hō͘ ta̍k'ê. (mā ēsái pàng hō͘ lí a'má thiaⁿ)

⚡️ THIAᴺ TIĀNIM

Kiasmos sī góa itti̍t chiok kahì teh pàng tiānim ê, kîtiong chi̍t lâng Ólafur Arnalds katī ū ēng katī ê miâ chò kó͘tián kap tiānim ê koa, Kiasmos sī pàng hō͘ ta̍k'ê thiàubú ê, 'Flown' bēbái. M̄koh nîbóe koh ū hoatkián Midland chit ê góa m̄bat thiaⁿ ê, 'Construct A Future' kài hó thiaⁿ.

♪ Justice - Neverender (Starring Tame Impala)
Justice kinnî chhut "Hyperdrama", nîbóe koh kā lāité 1 khek "Neverender" chò remix, góa kámkak Rampa ê pánpún siōng chán. M̄koh tī Coachella hiāntiûⁿ ê tenghóe ūkàu līhāi, m̄chai hiāntiûⁿ thiaⁿ khílâi ánná.

♪ Fred again.. - places to be
Bānglō͘ téng nálâináchē chit chióng hō͘lâng ēsái tī chhùnih kámsiū hiāntiûⁿ khìhun ê DJ Set. (tōsī kámkak ta̍kê chaiiáⁿ sī beh lâi lo̍kiáⁿ ê) Kinnî Fred again.. mā sī kài chhèng, chhut "ten days" lāité ê 'places to be' kài sekha̍p PARTY pàng lâi thiàubú.

💆 THIAᴺ KHA SANG LEH

Kinnî joa̍hlâng Jônsi kèngjiân koh chhut sin choanchi̍p, suibóng chhiùⁿpoân bísu̍t khòaⁿkhílâi m̄sī kài lísióng, m̄koh nā beh thiaⁿ chi̍tkoa m̄bat thiaⁿ kòe ê siaⁿim, 'Flickr' ētàng thiaⁿ khòaⁿmāi. EVISBEATS kanna khí m̄chai LámA tóūi lo̍kim, chhōa tòtńglâi chò koa, m̄koh góa siōng kahì kui tiuⁿ lāité ēng Hànjī hō koamiâ ê "Gînhô Siàuliân".

♪ The Marías - Paranoia
Thiaⁿ kài chē tang ê The Marías, chin hēnghok kinnî tán tio̍h in ê sin choanchi̍p, Spotify ū kā in lo̍k hiāntiûⁿ pánpún khǹg tī YouTube, m̄chai ūisiáⁿmih bô beh khǹg Spotify.

♪ FKJ - Lying Together (Live from Coachella)
Chiokkú chìnchêng iáu koh kámkak FKJ chiok khósioh, bô siáⁿlâng chai. Inūi kài ū thianhūn. Chhòngchok koh chiok bô kâng. Kiatkó chitmá liân góa chhùlāi ê siótī lóng teh thiaⁿ ah! M̄chai ánná thòaⁿ miâsiaⁿ ê. Nîbóe i tú kā kinnî ê hiāntiûⁿ lokkim "22_23 Live Sessions" khǹg bānglō͘ hō͘ ta̍k'ê thiaⁿ.

💡 SIN Ê HOATKIÀN

♪ NAFTA - A Mi Lado (vivo en el Luna Park)
O̍h Español (Sepanngâōe) kiōng beh chi̍ttang ah! Góa khòaⁿ ê sèkài koh khah khoah ah. Thiaⁿ ê koa mā khah chē, kinnî se̍ksāi chi̍tthoân NAFTA, in tī Argentina. Koa, koamiâ, koasû, iáⁿphìⁿ lóng sī siá Español. Chinchiàⁿ sī múi chi̍t khek lóng kài hó thiaⁿ.

♪ TAMTAM - Doors
Chit kúi nî khah bô hiah gâu tòe Ji̍tpún ê sin ga̍kthoân, m̄koh chòekīn mā sī hō͘ góa thiaⁿ tio̍h TAMTAM chit ê Tangkiaⁿe thoân. 2024 chhut "Ramble In The Rainbow" EP, Bíkok mā ū teh bē.

💿 KOH Ū CHIOK CHĒ

Kîtha, biánkóng mā sī ū kài chē bôhoattō͘ chi̍tpái hunhióng ē liáu ê. Kám beh siá tī ēté? Hó lah mā sī siá chi̍t ē hó ah. Ū sîkan ēsái chhōe lâi thiaⁿ, bô mā bô iàukín. Inūi hóthiaⁿ ê koa ē koh kèsio̍k chhut.