THÂU CHI̍T PÁI CHIA̍HHUN
Thâu chi̍tpái chia̍h hun tī Koktiong. Góa éngoán ē kìtit, la̍knî'á siōngbóe chi̍t cheh khò, siănséⁿ kóng, ta̍k'ê lóng ē khì Àmkheⁿ Koktiong. Pan'nih ê chi̍t ê o͘bīn pûipûi ê chapo͘ kā góa kóng, góa chhám ah, tī hia ittēng ē hō͘ lâng khihū, hia chhitthô gínná chiokchē.
Khaksi̍t, ji̍po̍h liáuāu, tō liáukái hia sī siáⁿmi̍h khoán ê só͘chāi, só͘pái Kotiong thâu chi̍tpái khòaⁿ "Kòpe̍k" (Kokuhaku) sî chiok ū kámkak. Inūi ha̍kseng'á kap kokhāu'á bôkâng, bô lâng beh chhapsiâu siănséⁿ ê. Siōngkhò lāusu tī tâi'á'téng kóng i ê, ēbīn ha̍kseng'á kóng katī ê, kòng iákiû ê kòng iákiû, pàngkoa ê pàngkoa. Ū sî'á, kehpiah ê pantiúⁿ khòaⁿ bē lo̍hkhì, koh ē choankang lâi kiò lán ài ū chāmchat.
Kináji̍t siá chi̍tphiⁿ sī, pòaⁿmî koh inūi iubūn utchut teh chia̍h hun, hō͘ góa siūⁿ tio̍h thâu chi̍t ki hun, tō sī tī Koktiong, kap chi̍t ê sèⁿ Hā ê tôngo̍h o̍h ê. Góa lóng kā i kiò chò Hāthiⁿ. (M̄chai pa̍tlâng kám ū ánni kā i kiò) I kap góa bô beh siōngkhò tī ha̍khāu lāité chhōe chi̍t ê só͘chāi chia̍hhūn. I sī chabó͘, kámkak bat chin chē tāichì. Góa ū chin chē tāichì lóng sī kap i o̍h ê, chia̍h hun tō sī.
I seⁿ chò sánsán, kap góa chhaputto, m̄koh pí góa koh khah pisiong (i ná ē hiahkín tō khòaⁿ bat chit ê sèkài?), i kanna chiok bat tāichì, chiok chē tōalâng ê tāichì lóng tī i hia hitpêng chaiiáⁿ ê. Thiaⁿ i ánná hō͘ i abú hoatkiàn i teh chia̍hhun, i thâu chi̍tpái kap láng chòhóe, i ánná thégiām kap chapo͘ ê hit chióng tāichì, hoānsè kàu hiānchhúsî góa tiāⁿtiāⁿ ē seng thè chabó͘ siuⁿ chi̍tkóa tāichì lóng sī siū i ê énghióng ê.
Hoâiⁿti̍t, góa tī Àmkheⁿ tha̍k chho͘tiong ê ji̍tchí o̍h chiokchē, chia̍hhun, kap lâng siophah, chia̍h to̍k, kap siănpái siá chêngphoe, làulâng, cháu hō͘ kéngchhat, hō͘ kàukoaⁿ jiok, tī gōakháu bé chiú bé hun ké chò 18 hòe, peh piah chhutkhì ha̍khāu, tī bānglō͘ kapi tiàm sńg kah 10 tiám gōa chiah kamgoān khì siōngkhò.
Siōngkhò lóng teh khùn, siănséⁿ ū chi̍tpái mn̄g góa: "Lí kám sī ū teh chia̍h to̍k?"
Inūi siuⁿ chhiaukoe ah, ū chi̍tkang, chhu'nih tō kā góa sóakhì Thôhn̂g ê ha̍khāu ah. M̄koh góa itti̍t chiok siàuliām tī hia se̍ksāi ê hiaⁿtī, chímōe, m̄sī kàuhōe hitchióng ê.
