> ## Content Index
> Fetch the complete content index at: https://tiatleng.to/llms.txt
> Use this file to discover other available public pages before exploring further.

# LŪN HALFTIME SHOW TÙI LÁN Ê ÌGĪ
- URL: https://tiatleng.to/lun-halftime-show-tui-lan-lang-e-i-gi/
- Published: 2026-04-05T05:54:40.000Z
- Updated: 2026-07-08T13:24:53.000Z
- Description: Kin-nî sī chi̍t ê hō-chò Bad Bunny ê koa-chhiú lâi chhiùⁿ. Góa tòe teh khòaⁿ, khòaⁿ liáu. Bián chhéng-kàu ke-khì-lâng góa mā chai kin-nî ê piáu-ián choa̍t-tùi sī ē-tàng siá ji̍p-khì le̍k-sú kì-lo̍k ê.
- Author: TIATLÊNG
- Tags: BÍCHIU, BÍKOK, PE̍HŌEJĪ, KOA

![audio-thumbnail](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/media/2026/04/2026-04-05--14-19-2_thumb.jpeg)

IF YOU ARE A 🐃 FEEL FREE TO LISTEN TO ME READ IT.

0:00

/542.616

1×

KHIĀ TĪ CHÚ Ê BĪN-CHÊNG LÁN LÓNG-SĪ CHI̍T-KE-HÉ-Á. Chit-phiⁿ lūn, hoat-piáu tī [TÂI-OÂN KÀU-HŌE KONG-PÒ](https://tcnn.org.tw/archives/270424?ref=tiatleng.to) tē 3,866 kî. 2026 3 goe̍h 30 kàu 4 goe̍h chhe 5\. Bāng-lō͘ ū khan, pò mā ū ìn.

Nā beh khòaⁿ choân-phìⁿ, chhiáⁿ chiūⁿ [YouTube](https://youtu.be/G6FuWd4wNd8?ref=tiatleng.to).

"[GOD BLESS AMERICA](https://www.youtube.com/shorts/aHlXIR7YBLQ?ref=tiatleng.to)." Lán bē-chió lâng eng-kai tiāⁿ-tiāⁿ thiaⁿ-tio̍h a-tok-á án-ni teh kî-tó. Chit-kù-ōe tī góa beh lūn ê chit phiⁿ lāi-té chiâⁿ iàu-kín.

M̄-chai lia̍t-ūi chí-mōe hiaⁿ-tī kám ū khòaⁿ Bí-kok kha-kiû "[SUPER](https://www.nfl.com/super-bowl?ref=tiatleng.to)[ BOWL](https://www.nfl.com/super-bowl?ref=tiatleng.to)" (TŌA ÓAᴺ-KONG) ê koàn-sì teh? Ta̍k-tang ê Jī-goe̍h tē-jī ê lé-pài àm-sî-á la̍k-tiám-pòaⁿ. Bē Bí-kok koah-pau ê chhan-thiaⁿ, ā-sī teh thîn bì-lù ê chiú-pa. Lâng-kheh kap thâu-ke ta̍k-ê lóng ē gia̍h-thâu, chù-sîn teh khòaⁿ hit ê tiān-sī hòng-sàng.

![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/2026/04/IMG_6112.jpeg)

Kìⁿ-nā the̍h bô Kong-pò ê chí-mōe hiaⁿ-tī, ē-tàng tiàm chia tha̍k.

Lán ē-tàng kóng chit-hō pí-sài sī [Bí-kok siōng chē lâng khòaⁿ ê](https://www.cnbc.com/amp/2025/02/11/super-bowl-59-viewership.html?ref=tiatleng.to). Tī pí-sài téng-ē-tiûⁿ hioh-khùn hit sî. Tiān-sī teh hòng-sàng kóng-kò kap [HALFTIME SHOW](https://www.nfl.com/super-bowl/halftime-show?ref=tiatleng.to) (TIONG-TIÛᴺ PIÁU-IÁN) koh-khah sī siōng chē lâng iàu-ì ê.

[Bad Bunny’s Super Bowl Halftime Sets a Record for Views, Roc Nation SaysThe company, which produced the show, says it racked up about 4.16 billion cross-platform views in 24 hours.![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/icon/favicon-1.png)The Hollywood ReporterRick Porter![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/thumbnail/GettyImages-2260111584.jpg)](https://www.hollywoodreporter.com/tv/tv-news/bad-bunny-super-bowl-halftime-view-record-roc-nation-1236520511/?ref=tiatleng.to)

3 goe̍h chhe 3, sin-bûn pò kóng, i chit-tiûⁿ sī siōng-chē lâng khòaⁿ ê.

Nā teh chò seng-lí-lâng ê, tī chit-sî beh hòng-sàng, chò kang-siong ho̍k-bū sī ài khai chē-chē chîⁿ. Siáu kùi! He sī ài iōng chi̍t-bió lâi khì sǹg ê. [Chi̍t-bió tō ài khai lí iok saⁿ-cha̍p bān Bí-kim](https://europeanbusinessmagazine.com/business/super-bowl-ads-cost-10m-for-30-seconds-who-pays-and-why/?ref=tiatleng.to). In ê chu-liāu kóng, Bí-kok [saⁿ ê lâng tō ū chi̍t ê lâng teh khòaⁿ](https://www.cbsnews.com/baltimore/news/super-bowl-lviii-most-watched-telecast-in-history/?ref=tiatleng.to) hit-mî ê chiat-bo̍k. [Chhiau-kòe chi̍t-e̍k ê jîn-lūi](https://www.ksnblocal4.com/2026/02/11/super-bowl-60-was-most-watched-program-nbc-history-fell-short-games-viewership-record/?ref=tiatleng.to), in ê ba̍k-chiu lóng teh khòaⁿ piáu-ián.

Iū-koh sit-tiān ah. Kì-lo̍k-phìⁿ.

Hiah-nī-á tiòng-iàu ê tiong-tiûⁿ piáu-ián chū-jiân sī chhiáⁿ hit-tang siōng kài ū miâ-siaⁿ ê koa-chhiú lâi chò-tiûⁿ. Kin-nî sī chi̍t ê hō-chò [Bad Bunny](https://www.facebook.com/BadBunnyOfficial/) ([Pháiⁿ-thò͘-á](https://www.instagram.com/badbunnypr/?ref=tiatleng.to)) ê koa-chhiú lâi chhiùⁿ. Góa tòe teh khòaⁿ, khòaⁿ liáu. Bián chhéng-kàu ke-khì-lâng góa mā chai kin-nî ê piáu-ián choa̍t-tùi sī ē-tàng siá ji̍p-khì le̍k-sú kì-lo̍k ê.

![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/2026/04/IMG_7079_VSCO.jpeg)

Thâu-pái tī KONG-PÒ hoat-piáu.

Ūi-chóaⁿ-iūⁿ? I chī-chūi? Góa seng pò, góa siōng kám-tōng ê hit-phah: Bad Bunny gia̍h i chó͘-kok, [Puerto Rico ê kî-á](https://youtu.be/G6FuWd4wNd8?si=jP-LeYIY89MWwHkD&t=610&ref=tiatleng.to) phāiⁿ teh, liām-chhiùⁿ ‘[El](https://www.youtube.com/watch?v=1TCX%5FAqzoo4&ref=tiatleng.to)[ Apagón](https://www.youtube.com/watch?v=1TCX%5FAqzoo4&ref=tiatleng.to)’ ([Sit-tiān](https://newlinesmag.com/reportage/a-private-company-provokes-an-energy-crisis-in-puerto-rico/?ref=tiatleng.to)) chit khek. Chit-khek sī-teh [khau-sé Bí-kok Chèng-hú](https://www.justjared.com/2026/02/09/el-apagon-meaning-lyrics-english-translation-bad-bunnys-song-about-puerto-rico-power-outages-has-super-bowl-moment/?ref=tiatleng.to) bô teh hó-hó-á kā in [chiàu-kò͘](https://www.bostonherald.com/2026/02/19/fuentes-puerto-ricos-blackouts-are-americas-problem/?ref=tiatleng.to). "[Iū-koh](https://newlinesmag.com/reportage/a-private-company-provokes-an-energy-crisis-in-puerto-rico/?ref=tiatleng.to)[ sit-tiān ah!](https://newlinesmag.com/reportage/a-private-company-provokes-an-energy-crisis-in-puerto-rico/?ref=tiatleng.to)" sī hia ê tó-bîn tiāⁿ-tiāⁿ kóng ê ōe.

Ē-tàng hō͘ lí [tōa tháu-pàng](https://tiatleng.to/tui-peh-nih-toh-e-tian-ian-tit-tioh-toa-thau-pang/) ê tiān-iáⁿ.

M̄-nā chhiùⁿ-koa, kui-ê kiû-tiûⁿ lóng piàn-chò Puerto Rico ê kong-kéng. Ū [chèng kam-chià ê choh-sit-lâng](https://youtu.be/G6FuWd4wNd8?si=WS1YhE--msVtSQXf&t=21&ref=tiatleng.to). [Tì koe-lê-á ê chò-kang-á-lâng](https://youtu.be/G6FuWd4wNd8?si=-yZcNGYOz3JTmnM%5F&ref=tiatleng.to). [Chiap-siū ](https://youtu.be/G6FuWd4wNd8?si=Q9lO-tiS4tqg8kwF&t=274&ref=tiatleng.to)[Bí-oān ê.](https://www.gao.gov/products/gao-24-105557?ref=tiatleng.to#:~:text=As%20of%20June%202023%2C%20FEMA,to%20funding%20shortfalls%20for%20projects.) Mā teh tián in ê [jîn-chêng-bī](https://youtu.be/G6FuWd4wNd8?si=hpmSOVss-54BMQZQ&t=53&ref=tiatleng.to). Té-té cha̍p-saⁿ hun gōa ê piáu-ián. Góa khòaⁿ-kìⁿ ê m̄-nā sī hia ê lâng teh siū-khó͘ ê le̍k-sú. Mā teh siūⁿ lán ê khiā-ke, Tâi-oân, éng-kòe ê [lông-gia̍p sî-tāi](https://www.youtube.com/watch?v=xoldYwhnHow&ref=tiatleng.to).

Sè-kài án-ná hoán-èng teh?

M̄-sī án-ni tō chún-tú-soah neh! I kèng-jiân chhōa [chi̍t tōa tīn lâng gia̍h chiok chē lán hoân-sè lóng hoah-bē-chhut sī sím-mi̍h kok-miâ ê kî-á chông chhut-lâi](https://youtu.be/G6FuWd4wNd8?si=m4j0MMd0GK-62zvF&t=717&ref=tiatleng.to). I chhiú hōaⁿ kha-kiû kóng chi̍t kù ōe "[GOD](https://www.youtube.com/watch?v=G6FuWd4wNd8&t=729s&ref=tiatleng.to)[ BLESS AMERICA](https://www.youtube.com/watch?v=G6FuWd4wNd8&t=729s&ref=tiatleng.to)" sòa-lo̍h-lâi tō khai-sí chi̍t ê chi̍t ê kā [Bí-chiu jī-cha̍p gōa ê kok-ka ā-sī hō͘ pat-kok thóng-tī ê só͘-chāi ê miâ](https://ca.news.yahoo.com/super-bowl-2026-halftime-features-canada-shoutout-and-a-waving-flag-bad-bunny-is-canada-down-viewers-say-034620692.html?ref=tiatleng.to) hoah chhut-lâi. Lāu-jia̍t chhī-chhā! Ná phah-kó͘ ná hoah-siaⁿ.

[TĀIKE TÙI PE̍HNIHTOH Ê HOÁNÈNG HUN SAᴺCHIÓNGChit-keng hō-chò Bé-so̍k-suh ê kū-lo̍k-pō͘, tī TŌA-ÓAᴺ-KONG hit-mî siāng-sî hòng-sàng. Lâng-lâng hoaⁿ-hí tòe-teh chhiùⁿ-koa thiàu-bú.![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/icon/cefc454012fbc0f02a4fbd4678fc524d-2-3.jpeg)TIATLÊNGTIATLÊNG![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/thumbnail/maxresdefault.jpg)](https://tiatleng.to/tai-ke-tui-peh-nih-toh-e-hoan-eng-hun-san-chiong/)

Kî-thaⁿ ê hoán-èng, chhiáⁿ tha̍k chit-phiⁿ.

Liām soah, i kā kha-kiû ê āu-piah bīn se̍h-kah thâu-chêng hō͘ kiàⁿ-thâu hip. Kiû ê téng-bīn siá:“[TOGETHER,](https://youtu.be/G6FuWd4wNd8?si=4pKNIieScWBDxTPm&t=756&ref=tiatleng.to)[ WE ARE AMERICA.](https://youtu.be/G6FuWd4wNd8?si=4pKNIieScWBDxTPm&t=756&ref=tiatleng.to)” Kiû-tiûⁿ lāi-té tī i āu-piah ê tōa-chiah tiān-sī, o͘-chóa pe̍h-jī, tōa-tōa hòng-sàng "[THE](https://www.instagram.com/reel/DUizbzxDfKC/?utm%5Fsource=ig%5Fweb%5Fcopy%5Flink&igsh=NTc4MTIwNjQ2YQ==)[ ONLY THING MORE POWERFUL THAN HATE IS LOVE](https://www.instagram.com/reel/DUizbzxDfKC/?utm%5Fsource=ig%5Fweb%5Fcopy%5Flink&igsh=NTc4MTIwNjQ2YQ==)". (Pí oan-siû koh-khah ū la̍t ê, kan-taⁿ thiàⁿ-thàng nā-tiāⁿ.)

Tī Bí-se kū-lo̍k-pō͘ [Bé-so̍k](https://www.yelp.com/biz/beso-downey?dd%5Freferrer=https%3A%2F%2Fwww.google.com%2F&ref=tiatleng.to) (BESO), tāi-ke teh khòaⁿ siāng-sî hòng-sàng.

### **AMERICA ≠ UNITED STATES**

Pháiⁿ-thò͘-á siūⁿ beh tùi iok chi̍t-e̍k ê Bí-kok kok-bîn kóng siáⁿ? Hui-siông kán-tan – [America m̄-sī kan-taⁿ Bí-kok nā-tiāⁿ](https://www.instagram.com/reel/CoU8yr9oD2A/?utm%5Fsource=ig%5Fweb%5Fcopy%5Flink&igsh=MzRlODBiNWFlZA==)."GOD BLESS AMERICA" ê [America tāi-piáu ê sī Bí-chiu](https://crowsneststpete.com/2016/04/20/is-it-america-or-the-united-states-of-america/?ref=tiatleng.to), [m̄-sī ko͘ chi̍t-ê Bí-kok](https://www.facebook.com/share/r/17ndJRWQue/). Che, m̄-nā Bí-kok-lâng hun bē chheng-chhó. Hoân-sè sī góa kap lí iáu-koh ū hái-lāi-gōa chē-chē lâng lóng bô-ì-sek ê chi̍t hāng tāi-chì. A.I. kā góa pò, [Bí-chiu-lâng](https://population.un.org/wpp/downloads?folder=Standard%20Projections&group=Most%20usedhttps://population.un.org/wpp/downloads?folder=Standard%20Projections&group=Most%20used&ref=tiatleng.to) iok [cha̍p-e̍k](https://data.worldbank.org/indicator/SP.POP.TOTL?ref=tiatleng.to),[ Bí-kok-lâng ](https://www.cbo.gov/publication/61879?ref=tiatleng.to)[iok](https://www.census.gov/popclock/world?ref=tiatleng.to) [saⁿ-e̍k](https://www.worldometers.info/world-population/us-population/?ref=ppc.land). Bí-kok ê jîn-kháu kan-taⁿ chiàm Bí-chiu ê saⁿ-hūn-it nā-tiāⁿ. Lán soah sî-siông kā Latinoamérica (La-teng Bí-chiu) tòng-chò bô khòaⁿ-kìⁿ. Bí-kok mā tùi chia-ê lâng [chò bô kong-pêⁿ ê tāi-chì](https://www.cfr.org/backgrounders/puerto-rico-us-territory-crisis?ref=tiatleng.to). Sū-si̍t lán nā-ū teh khòaⁿ-pò ê lán lóng chai.

[BAD BUNNY TUI NGÀITÊU YÛ MAKKE YINGI?Mí-koet Halftime Show tui ngài-teû yû mak-ke ying-i? Khon Fái Thu-é ke peú-yên, ngài sióng ke he ngài-teû ke chú-siên, ngài-teû khiung-yong pûn-ngìn chhṳ̍t-mìn ke li̍t-sṳ́, lâu Formosan ke vi-lòi.![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/icon/cefc454012fbc0f02a4fbd4678fc524d-2-4.jpeg)TIATLÊNGTIATLÊNG![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/thumbnail/z2jnx1id1rty7lby2mlo-2.jpeg)](https://tiatleng.to/bad-bunny-fai-thu-e-tui-ngai-teu-yu-mak-ke-yi-ngi/)

Ngài me yû siá Hak-fa ke vùn, chhiáng thu̍k.

**PIÁU-IÁN Ê TIŌNG-TIÁM CHHIŪᴺ Ē-BĪN SÓ͘ KÌ:**

1. Thâu-chi̍t-ê tī HALFTIME SHOW lóng chhiùⁿ [Se-pan-gâ-ōe](https://www.espn.com/nfl/story/%5F/id/47797741/super-bowl-half-show-history-hispanic-performers?ref=tiatleng.to) ê
2. Kap kok-chè hoah-siaⁿ America m̄ sī kan-taⁿ Bí-kok nā-tiāⁿ
3. Hō͘ lán lí-kái Puerto Rico lâng ê bîn-cho̍k kap le̍k-sú
4. Piáu-ta̍t [Hawaiʻi ê bûn-hòa](https://www.youtube.com/watch?v=8lwx9y9kfZ8&ref=tiatleng.to) mā bat hō͘ Bí-kok siau-bia̍t
5. Koa-chhiú bô it-tēng ài chò kong-si ê mi̍h-á, [mā ē-tàng hoán-khòng](https://youtu.be/KU5V5WZVcVE?si=H238xLp8-tnwoV8b&t=150&ref=tiatleng.to)

Chí-mōe Hiaⁿ-tī ah! Lán ē-tàng tùi Bad Bunny o̍h-tio̍h siáⁿ? TAIWAN m̄-sī kan-taⁿ kóng Tiong-kok-ōe, Hôa-gí ([Thăi-oán-lêⁿ](https://upload.wikimedia.org/wikipedia/commons/7/7f/NCL-001686009%5F%E8%87%BA%E7%81%A3%E6%9A%AB%E7%94%A8%E5%B0%8F%E5%AD%B8%E5%9C%8B%E8%AA%9E%E8%AA%B2%E6%9C%AC..pdf?ref=tiatleng.to)) ê [TAIWANESE](https://taitokchi.com/bad-bunny-super-bowl-halftime-show/?ref=tiatleng.to) nā-tiāⁿ. Koh ū [Kaxabu](https://www.facebook.com/kaxabu/), [Tayal](https://www.facebook.com/profile.php?id=100064743246737), [Hak-ngìn](http://laijohn.com/archives/pc/Pang/Pang,Hsiu/literature/Tin,Ngai.htm?ref=tiatleng.to), [Pangcah](https://youtu.be/oWtkI3rHuWI?si=RX0ozN2zaM-SlyEi&t=212&ref=tiatleng.to), [Siraya](https://www.instagram.com/tabe%5Fsiraya/?ref=tiatleng.to), [Tâi-oân-lâng](https://www.facebook.com/share/p/1AsEJY1fXm/) (Kheh-lang kā hō-chò [Ho̍h-ló-lâng](https://ji.taioan.org/chhoe/?x=H%26%23333%3B-l%F3-l%E2ng&tab=gisu&ref=tiatleng.to)), í-ki̍p chē-chē ê bîn-cho̍k. Kiám m̄-sī? "[Ilha](https://openmuseum.tw/muse/digi%5Fobject/13192d5ea136d50d58ecb4f9bb6799a1?ref=tiatleng.to#155308)[ formosa](https://openmuseum.tw/muse/digi%5Fobject/13192d5ea136d50d58ecb4f9bb6799a1?ref=tiatleng.to#155308)!" chit kù cha̍p-la̍k sè-kí liû-thoân kàu-taⁿ ê Phû-tô-gâ-ōe hō͘ lán ē-tàng su-khó lán chhāi tī chit-ê tó-sū ê jîn-bîn ē-sái sī chi̍t ê kiōng-thong-thé, hō-chò [Formosan](http://taiwaneseamericanhistory.org/wp-content/uploads/2014/12/81%5F%E6%97%A9%E6%9C%9F1960%E3%80%9C1970%E5%B9%B4%E5%A8%81%E6%96%AF%E5%BA%B7%E6%96%B0%E5%A4%A7%E5%AD%B8-%E5%8F%B0%E7%81%A3%E5%AD%B8%E7%94%9F%E5%9C%A8%E5%8F%B0%E7%81%A3%E5%BB%BA%E5%9C%8B%E9%81%8B%E5%8B%95%E6%89%80%E6%89%AE%E6%BC%94%E7%9A%84%E8%A7%92%E8%89%B2%5F%E9%99%84%E4%BB%B65.jpg?ref=tiatleng.to).

Se-pan-gâ Kok-ông chhut-lâi kóng-ōe. Kám-sī siū-tio̍h La-teng Bí-chiu ê éng-hióng?

Gō͘-cha̍p-gō͘ nî chêng Tâi-oân tng teh Tiong-kok Kok-bîn-tóng kài-giâm. [Gôan-táu, Khe-chiu ê la̍k ê ka-cho̍k î-bîn Pa-se](https://www.ocac.gov.tw/OCAC/Pages/Detail.aspx?nodeid=345&pid=79127045&ref=tiatleng.to). Tiúⁿ-ló Kàu-hōe mā tèng-kun Pa-se [pòaⁿ sè-kí](https://www.roc-taiwan.org/brsao/post/4015.html?ref=tiatleng.to) ah! Kap Tiong-hôa Bîn-kok chò pang-kau ê chhun cha̍p-jī ê, kòe-pòaⁿ-sò͘, ū [chhit ê](https://www.mofa.gov.tw/AlliesIndex.aspx?n=167&sms=33&ref=tiatleng.to) tō tùi La-teng Bí-chiu lâi ê.

Chit-liâu í-á kî-si̍t sī choân sè-kài siat-kè kah siōng-hó ê í-á!

Góa tùi COVID-19 sî tòe chú. Tī kū-nî joa̍h-lâng [siū-sé](https://www.youtube.com/live/qVsa1BQKax8?si=9KFgdt6aqobggQbQ&t=4303&ref=tiatleng.to). Chò chi̍t ê chhài-chiáu-á Ki-tok-tô͘, sin sù-tô͘. Google Gemini kā góa siāu-kài “[KHÉ-SĪ-LIO̍K](https://www.sl-pc.org.tw/bible/3/REV/7?ref=tiatleng.to)” tē VII chiuⁿ, tē IX chat. Góa beh ēng góa ê bó-gí ke’ na ‘Tayal, Thài-ngá-ní ê jī, kì tī pò lāi-té: "[Babaw](https://cb.fhl.net/read1.php?VERSION8=thv2e&VERSION6=tte&VERSION23=tay&TABFLAG=1&chineses=%26%2321855%3B&chap=7&submit1=%26%2338321%3B%26%2335712%3B&ref=tiatleng.to) nasa, mita saku, ktan maku qutux lahuy na squliq, ungat ima pthuyay lmpuw kinkhmayan nya. Lhga ga minkahul squ ana inu na kinhangan, cinqlangan, gluw, sinngya’an ke mwah, ms’urux te puyuw nqu smyax tman ki Uyuk Mit kwara, mlukus plqwi huluy meng qara na saping qpa nga."

[Spain’s King Felipe VI acknowledges that there were ‘many abuses’ in the colonization of AmericaThe monarch’s statement comes as Spain seeks to ease tensions with Mexico following the 2019 dispute with Andrés Manuel López Obrador![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/icon/apple-touch-icon-2.png)Ediciones EL PAÍS S.L.Miguel González![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/thumbnail/NTGAIO2QRZHKXLCHMSCFMOQK4Q.jfif)](https://english.elpais.com/spain/2026-03-16/spains-king-felipe-vi-acknowledges-that-there-were-many-abuses-in-the-colonization-of-america.html?ref=tiatleng.to)

Chì-chió, che sī chi̍t-ê khai-sí.

Lán í-keng thiaⁿ-kìⁿ chi̍t-kóa Tâi-oân koa-chhiú, [ēng in ê koa-siaⁿ thè kong-gī hoah-siaⁿ](https://www.facebook.com/SandeeChan.musicface/videos/646861986743251/). Nā lán ū chi̍t-kang ū án-ni chhiūⁿ HALFTIME SHOW ê ki-hōe, lán kám ū siáⁿ-lâng thang chhiūⁿ Pháiⁿ-thò͘-á hiah hó-táⁿ, koh the̍h ē tio̍h [Apple Music ê kià-hù](https://finance.yahoo.com/news/apple-bought-super-bowl-halftime-112111113.html?ref=tiatleng.to) lâi kiâⁿ Chú beh lán kiâⁿ ê lō͘, chò hô-kái ê sù-chiá? Chhin-chhiūⁿ lán ê kok-kiû, iá-kiû pí-sài, [WBC](https://www.2026wbc.jp/?ref=tiatleng.to).

Ko͘-chui tō ē tit-lâng-thiàⁿ.

M̄-koán lán kóng sím-mi̍h gí-giân, sī sím-mi̍h bîn-cho̍k. Lán khiā tī Siōng-tè ê bīn-thâu-chêng lóng sī I só͘ chhòng-chō ê kiáⁿ-jî. Tō chhin-chhiūⁿ Apple TV 2025 ê "[PLUR1BUS](https://www.youtube.com/watch?v=u1ThiHmCHlw&ref=tiatleng.to)", kā chèng-lâng lâi chín-kiù. Ā-sī Peng-tó ê koa-chhiú Björk 2001 hoat-piáu ê hit khek “[UNISON](https://www.youtube.com/watch?v=6rxgzq5W6E4&ref=tiatleng.to)" ê koa-sû "We Shouldn't Fight." kāng-khoán. Ǹg-bāng seⁿ-thòaⁿ tī chit ê tó ê chí-bē-hiaⁿ-tī ē-tàng sió-kóa-á lí-kái góa siūⁿ beh piáu-ta̍t ê sim-chiâⁿ. AMEN.

※ Chit-phiⁿ ū kái-siá ìn tī "[TÂI-OÂN KÀU-HŌE KONG-PÒ](https://tcnn.org.tw/archives/270424?ref=tiatleng.to)" tē 3866 kî.