HŌAᴺ "LĀUJIA̍T HOAHSIAᴺ" NN̄G TIÛᴺ IÂᴺTŪI Ê SIMTEK
Kūnî hiohjoa̍h chiaptio̍h Tâibûnkoán ê sìnsit, kóng kám ū chhùbī beh lâi hōaⁿ 2023 ê iâⁿtūi. Heⁿh, tō sī liāmkoa iâⁿtūi, kūnî sī tī Tâitiong pān ê. Engkai sī kūnî chhúpān ê kàusiū tng bô êng, khiok hō͘ góa ū kihōe lâi hōaⁿ.
Suibóng chiâⁿchē lâng khòaⁿtio̍h kongka tanūi chúpān ê háipò hiah tōajī ê Pe̍hōejī "LĀUJIA̍T HOAHSIAᴺ" tō kā lán chànsiaⁿ oló (lán lóng chai chènghú kàu taⁿ koh teh kìm lán ê jī), āupiah kîsi̍t ū chēchē simsng ê sūchêng. Chóng'sī lán piàⁿ kòe ā. Khòaⁿ chit phiⁿ bûn ê lí mā ēsái piàⁿ khòaⁿmāi.
2023 ê iâⁿtūi, chi̍t lépài tī Táⁿkáu pān "liûhêngkoa iâⁿtūi", chi̍t lépài tī Húsiâⁿ pān "liāmkoa iâⁿtūi". Nn̄g tiûⁿ chhamka ê lâng lóng bián khai pòaⁿ sian chîⁿ, koh tòa biánhùi, chia̍h biánchîⁿ. Thiaⁿ khílâi chiâⁿ hókhang ê tāichì, chí sī chènghú hêng Tâioânlâng ê siàu nātiāⁿ.
Tâibûnkoán kap góa chihchiap, m̄ koh chúpān sī góa ê pêngiú, GHYZ studio. In sī teh chò siatkè'ê, mā kiam chò oa̍htōng. Túhó lóng sī Táⁿkáu gínná, mā inūi bat góa, chaiiáⁿ Pe̍hōejī koh ū Tâigíbûn pōeāu ê chi̍tkóa'á tāichì.
Lán chúiàu ēng Instagram lâi soanthoân iâⁿtūi.
Sǹg sī bô gōa kú tō khí phùibīn ā, nn̄g pêng ê sèngkeh lóng chiâⁿ ngē, m̄ koh mā chū ánne, kap in thólūn tāichì, tī LINE lóng ēng Pe̍hōejī lâi ko͘thong. Jîchhiáⁿ, hiāntiûⁿ góa mā kiò in tō ài kóng Tâioânōe. Chìchió gia̍h maikhuh choa̍ttùi sī Tâigí, khiā hiāntiûⁿ mā chhaputto chhit peh siâⁿ, ū kā in kóng beh kóng Tionggí tō khah sehsiaⁿ ā piⁿ'kóng. Hoâiⁿti̍t in mā lóng kóng kah chin hoaⁿhí ê khoán.
GÓA CHÒ Ê SŪKANG
hōaⁿ oa̍htōng kah chi̍tpòaⁿ bô ài chò ā, só͘í ū ê pō͘hūn bô chhamú tio̍h, nā ū, góa khólêng koh kái chiok chē tāichì, phìjū hiāntiûⁿ ê chísī kap piāntong ê pauchng, téngténg.
- anpâi kap chihchiap siănséⁿ
- iâⁿtūi chútê (púnchiâⁿ beh hō "bô lí sī teh tōasiaⁿ siáⁿ lah")
- Tâigíbûn chioân kap kàutùi
- chúchhî (pō͘hūn)
- hiāntiûⁿ tàusaⁿkāng
Kîsi̍t ta̍k'ê ū hoaⁿhí tō hó lah, pān kàu siōng bóe ê simchêng. (m̄ tio̍h hó kachài ū hoaⁿhí)
ĒSÁI KÁICHÌN Ê
- Simchêng ài ēhiáu tháupàng (katī lah)
- KÌM TIONGGÍ TIONGBÛN: Ǹg choân Tâigí, choân Tâibûn hiòngchiân
- Ài kap choân Tâioân siongkoan khohē liânhē
- Ài tn̂gkî chò, saⁿ kàu gō͘ tang kâng thoânthé lâi hōaⁿ
- thoântūi ê chokphín TBK èngtong chhōe jînchâi kā in lo̍kim hoatpiáu (siáu hóthiaⁿ chin phahsńg bô kongkhai)
- TBK engkai ài hō͘ goán tī hiohjoa̍h kípān
- TBK m̄ bat jī, liāmkoa iâⁿtūi ēng chāilâi Tâioânlâng siá ê Hànjī kóng siá m̄tio̍h
- piāntong ū sî chē ū sî chió, nā ū āupái, góa lâi hōaⁿ
- hākhò liáu ài ū ēsái lā tisái, chhitthô ê chūhōe
Bôsèjī chiūⁿ tiānsī, ǹgbāng ū chi̍t kang ē siausit.
Chi̍t kò goe̍h lāi, pān nn̄g tiûⁿ iâⁿtūi khaksi̍t chiâⁿ keng. Kachài thoântūi chin phahpiàⁿ, siăⁿséⁿ kap ha̍kseng ê kauliû mā chin chhùbī. Góa ǹgbāng ê, tō sī bôkâng nîhòe, chò bôkâng thâulō͘ ê lâng ēsái tàutīn seⁿ chhut sin ê chhòngchok. Sūsi̍t, chinchiàⁿ múi chi̍t cho͘ ê chokphín lóng hō͘ góa chin kámtōng, khósioh bô hoattō͘ kongkhai tī bānglō͘ hō͘ ta̍k'ê phīⁿphang.
Ah! Koh ū nn̄g tiûⁿ iâⁿtūi lóng ū imga̍khōe, góa chiâⁿ kahì tī Hamáseng kau'á'piⁿ ê "Sió Chúi Kheⁿ" chhùbóeténg, thiaⁿ GínnáÔng kap A'Khòabián, liām koa tiûⁿ tī Tâibûnkoán kanna siuⁿ iâuoán ā, m̄ koh siaⁿim hòngsàng phínchit siáu hó, lióng lân ah.
P.S. Itti̍t siūⁿbeh kā simchêng kì'lo̍hlâi soah thoa kui nî ê, só͘pái tō chhengchhái siásiá leh! Siá chhutlâi khah iàukín.
