> ## Content Index
> Fetch the complete content index at: https://tiatleng.to/llms.txt
> Use this file to discover other available public pages before exploring further.

# KĀ TĒHŌMIÂ THÒAⁿLO̍HKHÌ Ê PHIATPŌ͘
- URL: https://tiatleng.to/ka-tehomia-thoanlohkhi-e-phiatpo/
- Published: 2024-07-12T06:35:10.000Z
- Updated: 2026-03-13T09:05:05.000Z
- Description: Tī Sutāi tha̍k giánkiùsó͘ mā chhaputto kā khò siuliáu ah, kūnî, bat siu "Tēmiâ Ha̍k" ê khò, chhōe lâi tēlí, le̍ksú, kap gígiân siongkoan ê kàusiū lûnliû kah, siukhò ê ha̍kseng'á mā sìkè lâi ê. Chi̍t hakkî o̍h, khaksi̍t liáukái bēchió tùi tēmiâ jīnbat Tâioân ê chi̍tkóa kîkhá.
- Author: TIATLÊNG
- Tags: TÂIOÂN, PE̍HŌEJĪ

Tī Sutāi tha̍k giánkiùsó͘ mā chhaputto kā khò siuliáu ah, kūnî, bat siu "Tēmiâ Ha̍k" ê khò, chhōe lâi tēlí, le̍ksú, kap gígiân siongkoan ê kàusiū lûnliû kah, siukhò ê ha̍kseng'á mā sìkè lâi ê. Chi̍t hakkî o̍h, khaksi̍t liáukái bēchió tùi tēmiâ jīnbat Tâioân ê chi̍tkóa kîkhá.

Chit phiⁿ bô beh siāukài ánná lâi se̍ksāi tēhōmiâ, sī beh kántan hunhióng góa ê chi̍t ê siūⁿhoat. Chiū sī, tâiténg ê siănséⁿ, ēkha ê giánkiùseng lóng chin oànthàn hiah chē chāilâi ê tēmiâ, ū kèta̍t ê, ū le̍ksú ê, ū kò͘sū ê, lóng bôkhì ah, bô lâng koh ē kìtit. Hoānsè chngthâu mā phahng ah, á sī kái chò bô ìgī ê sin tēmiâ. (Tiongkokmiâ?)

![](https://storage.ghost.io/c/f0/bd/f0bd98f0-b936-4488-bda5-c3bef0e5f14f/content/images/2026/03/Screenshot-2026-03-01-at-20.56.56.png)

Tâioânpótô͘ lāité ê Saⁿkángchôaⁿ. ©[Tēlí Chusìn Khoha̍k Choantê Giánkiù Tiongsim](https://gissrv4.sinica.edu.tw/gis/twhgis/?ref=tiatleng.to)

M̄chai sī in chheh tha̍k siuⁿ chē siuⁿ khiáu, ā sī góa thâukhak bái kah siuⁿ chhiaukòe. Góa tō kámkak, nā sī lí chinchiàⁿ hiahnī iàuì hit ê kó͘chá tēmiâ, oànthàn bô lâng teh thoânsêng ah. Ánni, **kám m̄ sī khì hia khui chi̍t tàⁿ chìⁿ kepâi ê, ā sī kiâmchúike, chhàu tāuhū tō hó?** Phìjū kóng, nā "Saⁿkángchôaⁿ" tēmiâ beh sí ah, tō lâi khui chi̍t tàⁿ "Saⁿkángchôaⁿ Pn̄goân" (tongjiân mā ēsái siá Hànjī), Hànjī èngtōng siá "káng" hō͘ lâng kái chò "khang" ê būntê mā sūnsòa káikoat, jōa hó.

M̄thang bē kì, khuitàⁿ liáu, ài khì Google Maps, Apple Maps, LINE spot, tengkì lí ê tiàmmiâ, siōnghó sī ētàng tī foodpanda, UberEATS hō͘ lâng kiò ē tio̍h, ánne, tō kántan ēsái kā katī siūⁿbeh thòaⁿ'lo̍hkhì ê tēhōmiâ kiù tòtńglâi neh! Bô tiāⁿtio̍h lâng hoathiān liáu koh lâi kā lí chháihóng, chiâⁿchòe Instagram ā sī Té Iáⁿphìⁿ liapiáⁿ ê hó só͘chāi.

Kiù chi̍t ê tēhōmiâ ê sêngpún, kap khui chi̍t tàⁿ bē kepâi ê khaisiau pêⁿpêⁿ, ánni, lán ēsái sǹg, 30 bān kàu 50 bān hō͘ lí kiù chi̍t ê tēmiâ, mā kiù tēmiâ āupiah ê kò͘sū. Sī m̄ sī chin kántan leh?

P.S. M̄koh lán mā sī ài kā kepâi chìⁿ khah hóchia̍h haⁿh...