Io̍kchéⁿ ê soànthâumī

Kinnî teh chò Tâilâm Chhīchènghú ê àn, līkhui Húsiâⁿ liáu, sòa tiantó ài tńg'lâi sìkè kā lâng chò hóngtâm. Chit lépài, ū kihōe, ài kàu Io̍kchéⁿ kàuhōe chháihóng, suibóng sī hn̄ghn̄ghn̄g, m̄koh ēsái khí 1 ê bô khì'kòe ê só͘chāi, māsī chin simsek.

Chháihóng liáu, bo̍ksu kap bo̍ksuniû sáichhia chhōa góa khí chit keng māsī ū lâi chūhōe ê hōeiú khui ê tiàm "A'Hun Mīkoán". Menu téngbīn koh chinchiàⁿ ū Iûⁿchhunmī kap Soànthâumī 2 chióng. Mī chúhó chiūⁿtoh, 1 óaⁿ lāité ê thngsî'á kap óaⁿté m̂óaⁿm̂óaⁿ lóng soànthâu, mī m̄sī sèpān mā m̄sī tōapān ê, lām bahsò kap chhang'á, chia̍h chìnchêng ài kā ùnliāu lā chòhóe, ánne bī chiah ē chiâuchn̂g.

Chinchiàⁿ hó chia̍h, bô chhī kòe ê kháubī, tānsī khaksi̍t chia̍h liáu ē chhùichhàu, pí chia̍h chúikiáu koh khah khióngpò͘ kúi'á pōe, ánne káikoat? Chia̍hpá khí tiám Io̍kchéⁿ bêngsán Soāiⁿ'á'peng tō bô būntê ah la̍h.

Inūi góa chinchiàⁿ bô chia̍h'kòe "Soànthâumī" chit tò liāulí, mn̄g kàuhōe bo̍ksuniû kóng kámsī Io̍kchéⁿ ê te̍ksek, m̄koh I soah hôe góa: "Bô la̍h, Tâilâm sìkè mā ū." Siūⁿsiūⁿ leh, kîkoài, góa tī Húsiâⁿ 3 tang  mā bô khòaⁿ kòe lâng khăngpáng ū siá kòe soànthâumī neh? Íāu ài koh chài chúì khòaⁿmāi.

P.S. Chit tàⁿ mā ū teh bē ló͘bī, gún ū chia̍h tio̍h Tâioângû.