BÔÀI CHIA̍H CHÀNG Ê GOÂNIN

Tòahàn liáu, ta̍knî Gō͘goe̍hcheh khòaⁿ lâng tī bānglō͘ téng iaupáchhá, tō bô siáⁿmih khùila̍t kah lâng siochiⁿ khah ài chia̍h tó chi̍t chióng chàng. Tongjiân che sī ū goanin ê, inūi goán tau ū lâng khui bahchàng tàⁿ. Góa khólêng ài koh cha̍ptang ê sîkan chiah siūⁿbeh chia̍h chàng.

Tāikhài beh jīcha̍p tang ê sîkan, goán tau ê pengtû, ittēng lóng ē khǹg chàng, a'pah nā bô tīteh, a̍hsī i pîntōaⁿ chú, tō ē chhoe lâi chia̍h. Pêngkin chi̍t lépài bô tiāⁿtio̍h tō chia̍h chi̍t lia̍p. Gínná sî góa chin ài chia̍h, koh ū hoattō͘ chia̍h nn̄glia̍p. Chhut siāhōe liáu tō ná lâi ná siān ah.

Hit keng bahchàng tàⁿ, kîsi̍t sī khui tiàmbīn ê. Khiā Tiongle̍k, ū thànchîⁿ, bô gōa kú koh tī chhiathâu khui tē jī keng. JÎCHHIÁᴺ BĒ JĪCHA̍PSÌ SIÓSÎ. (a'î kò͘ tàⁿ bat pòaⁿmî'á tútio̍h thǹgkhò͘ tián lānchiáu ê lângkheh, chi̍t kha that lo̍hkhì ê iáⁿphìⁿ bat hō͘ sinbûn pò chhut'lâi) Sī góa ê Kūkong kap in chi̍tkehóe'á pháng ê. Khăngpáng kap tiàmmiâ chin kantan, hōchò "KAGĪ LÎM'KA BAHCHÀNG", kuike tùi Kagī pòaⁿ kàu Tiongle̍k thànchia̍h. Tùi chngkha lâng kàu kinnî góa Sinnî khì pàihóng, in íkeng sī hógia̍h kah kā chhù chonghông kah bēsu Bînsī pehtiámtòng ê hôhoa kám. Mā bô teh chia̍h thâulō͘ ah, chhù'nih lóng teh choansim chhiâⁿkiáⁿ kah thèhiu, khòaⁿ Netflix. Tio̍h, nn̄gkeng tiàm lóng siu ah.

In tiàm ū chi̍t ê te̍ksû ê só͘chāi, tōsī chi̍t nî kantaⁿ Gō͘goe̍hcheh hit kang hiohkhùn, chin chē lâng lóng siàusiūⁿ lâi chia̍h soah bô tè bé.

Íchêng chiok kahì in tiàm'nih chàukha ê bī, Kagī chàng, engkai tō sī lâng kóng ê ēkáng chàng, lâmpō͘ chàng. Sī ēng sā'ê, suibóng kui ê chàukha sipkhì chin tāng, m̄koh sā chàng ê bī góa chiâⁿ kahì phīⁿ.

Hoâiⁿti̍t, góa sī kámkak koh ài tán cha̍pnî góa chiah siūⁿbeh chia̍h chàng.