Sign in Subscribe

A'SOAT Ê CHHÁ ÌMĪ

"Thâuke! Tosiā lah! Chiok hó chia̍h ê! Chiokkú bô lâi chia̍h ah." "Ná ē ēsái hiahkú bô lâichia̍h?!" Tī joa̍h kah beh sí ê epo͘ 5 tiám, góa kap chàukha soat tosiā liáu tō kóaⁿkín phāiⁿ phāiⁿ'á kín soan ah.

A'SOAT Ê CHHÁ ÌMĪ
Chhá ìmī, chitmá chi̍tpôaⁿ sǹg lí pehcha̍p kho͘.
audio-thumbnail
Listen to me read it in Tâigí (Taiwanese) if you’re a 青瞑牛 🐂
0:00
/232.852

"Thâuke! Tosiā lah! Chiok hó chia̍h ê! Chiokkú bô lâi chia̍h ah." "Ná ē ēsái hiahkú bô lâichia̍h?!" Tī joa̍h kah beh sí ê epo͘ 5 tiám, góa kap chàukha soat tosiā liáu tō kóaⁿkín phāiⁿ phāiⁿ'á kín soan ah.

Poaⁿ tò'tńglâi Táⁿkáu kiōng beh sì kò goe̍h ah, chòekīn chiah chèngkeng chhutlâi kiâⁿkiâⁿ teh. Chêng kúikang khì nn̄gkeng kapi thiaⁿ. Suibóng nn̄g keng lóng sùsīsùsī. M̄kú, kîtiong chi̍t keng teh kò͘ ê thâuke iáu koh sī kâng chi̍t ê. Chiūánni, hō͘ góa ū chi̍tchióng "Góa tńglâi Kohiông ah." ê kám-kak.

Khòaⁿ'khílâi phó͘thong phó͘thong, kîsi̍t kanghu kài gâu neh.

Chit keng "aSoat Sióchia̍hpō͘" mā sī. Ōe nā beh kóng khah bêng, "Chhá Ìmī" thûi'lo̍hkhì, tō ū 100% tńglâi Kohiông ê khìbī. Koh m̄nā Kohiông nātiāⁿ, sī tńglâi Hámáseng ê kámchêng.

Ta̍k'ê kám chaiⁿ Hámáseng tī tóūi?

Cha̍p gōatang chêng, tôngo̍h kap góa chhut hitpún chheh hōchò "Háiang" (Tiongbûn Kéngkò) lāité tiāⁿtio̍h ū siāukài. (nā bô sǹg lí soe) Nā tha̍k kòe Kâusan'á Tāiha̍k ê, choa̍ttùi lóng chaiⁿ, aSoat in ê khăngpáng, in kòa chiaupâi ê, tō sī chhápn̄g (Tiongbûn Kéngkò). Tio̍h! Tō chiah kántan, chhápn̄g. Ittēng sī chhá hiam ê. Éngkòe góa chhōa chiok chē pêngiú lâi, in lóng oló kah. Á góa leh? Góa ēsái chi̍t lépài chia̍h 3, 4 pái, lóng chia̍h chhá ìmī.

Chhām kolêchhài, bahsi, kòngoân, hê'á chòhóe chhá.

Hámáseng chiâⁿ chē hōchò "ha̍kseng'á tiàm" teh bē chia̍h ê. Chit keng mā chúnsǹg lah. Kèsiàu chiahē chiâⁿ hó, hō͘ ha̍kseng'á ū khah anchoân ê īsǹg lâi chia̍h, ū kàu kamsim ê, bô?

Ichêng bat tiāⁿ khì ê kapi tiàm.

Góa kám ū chia̍h chhiaukòe 100 kái? Hoānsè ū neh, tùi 2014 kàu 2019, 2020 līkhui Kohiông. Góa kinpún ta̍kji̍t lóng tī Hámáseng lōalōasô, saⁿtǹg mā tī chia. Hámáseng ê chia̍hsi̍t ētàng píphēng kehpiah chng Iâmtiâⁿ ê ìsù lah!

Lóngchóng chia̍h liáuliáu.

Ū sîchūn góa koh ē kā aSoat tòngchò háisántàⁿ lâi chùbûn. Kiò pn̄g, chhá kúihāng'á chhài, koh kah chiannn̄g. Chi̍t ê lâng tī 20 gōa hōe ha̍kseng'á piⁿ'a hiángsiū. Ūkàu sóng.

Kachài ū lâng lâi chiap, chiok hibāng aSoat chia̍h pahjī.

Chin kámsiā aSoat iáukoh tīteh. 2019 hitchām'á ū hoatkiàn chháchhài ê aî (siókhóa'á ū nîhòe) lóng bô tī tiàm'nih. Chiok hoânló ū chi̍tkang aSoat ē bôkhì. Góa, góa ná siūⁿ tō ná kiaⁿ. M̄koh, engàm chia̍h ìmī sî, lâng chhàchhàchhà. Tô͘chí mā ū khah siàuliân ê lâi chiap ah! Hòngsim ah. Bī bô piàn tō hó.